Deni oo kulan la qaatay Guddiga Amniga Ee Gobolka Karkaar
-
WARIYAHA QARDHO GAROWE ONLINE
- Posted On 30-10-2019, 07:26AM
QARDHO, Puntland - Madaxweyne Siciid Cabdullaahi Deni oo ku sugan magaaladda Qardho ee xarunta Gobolka Karkaar, ayaa xalay kulan la qaatay Guddiga Amniga ee Gobolka Karkaar.
Madaxtooyadda dowladda Puntland ayaa waxay fahfaahin buuxda ka bixisay qodobadda diiradda lagu saarey Kulanka uu Madaxweynuhu la yeeshay Guddiga Amniga ee Gobolka Karkaar.
“Masuuliyiinta heer Gobol iyo heer Degmo ayaa kulan la qaatay Madaxweynaha," ayaa lagu bilaabay bayaanka oo nuqul kamid ah uu helay warsidaha Garowe Online.
War-saxaafadeedka ayaa intaas ku daray: "Waxay uga xog-warameen xaaladda guud ee Gobolka Karkaar iyo kan Degmada, Saraakiisha Laamaha Amnigu waxay ka warbixiyeen sida xaaladda Amni ay u wanaagsantahay.
"..horumarada laga sameeyay dhinaca Amniga, Masuuliyiinta heer Degmo waxay ka warbixiyeen hormarka balaaran ee ka socda degmada Qardho," ayuu ku daray warka qoraalka ah.
Deni ayaa Talaadadii lagu soo dhaweeyay Qardho, halkaas oo durbadiiba uu xariga ka jaray saldhig cusub, oo uu tababar ugu ugu furay cutubyo kamid ah xoogaga difaaca Puntland.
Madaxweynaha ayaa sheegay in xukuumadiisa ay ahmiyadda koowaad siineyso sidii dib loogu dhisi lahaa ciidamadda Puntland isla markaana loogu diiwaan-gelin lahaa hanaanka cusub.
GAROWE ONLINE
