Gaas: bisha Junuary ayaa lasoo dhisayaa gudiga doorashooyinka
-
- Posted On 28-12-2014, 02:51PM
December 28, 2014 (GO)- Madaxweynaha Puntland Cabdiweli Maxamed Cali Gaas ayaa sheegay in sida ugu dhaqsaha badan dib loogu amba qaadi doono geedi socodkii dimuqraadiyeynta Puntland.
Gaas oo ka jawaabayey su'aal Radio Garowe weydiiyey kadib markii uu soo xirmay shirkii la xisaabtanka xukuuamda ee labada maalmood Garowe ka socdey, wuxuu carabka ku adkeeyey in dimuqraadiyeyntu tahay ajendaha ugu muhiimsan dowlada.
Su'aal kale oo Garowe Online weydiisey Madaxweynaha ayaa ahayd "goormaa lasoo magacaabayaa Guddiga Doorashooyinka?" Gaas oo su'aashaas ka jawaabayey wuxuu sheegay in bisha soo socota ee January bartamahaeeda lasoo magacaabi doono xubnaha guddiga doorashoyinka.
" bisha January ee soo socota ayaan rajeyneynaa inaan soo magacawno guddiga doorashooyinka hadii aniga iyo Barlamanku isku waafaqno...waa waxa nalaku qiimeynayo waana ajandeyaasha ugu muhiimsan dowlada" ayuu yiri.
Dhanka kale Madaxweynaha Puntland wuxuu sheegay in kulankii la xisaabtanka xukuumadu guul kusoo dhamaaday isagoo xusay in kulamada caynkan oo kale ah la joogteyn doono, lixdii bilood ee kastana mar la qaban doono.
Barlamanka Puntland ayaa kal-fadhigiisii ugu dambeeyey ee soo xirmay 18-kii bishan ku ansixiyey xeerka guddiga doorashooyinka Puntland.
GAROWE ONLINE
