​Gaas iyo Guddiga Abaaraha oo Garowe ku kulmay

GAROWE, Puntland- Guddiga dowladdu u xilsaartay u gurmashada dadka abaaruhu saameeyeen ee ku sugan deegaanada Puntland, ayaa maanta la kulmay Madaxweynaha Puntland oo weheliyaan ku-xigeenkiisa iyo Guddoomiyaha Barlamanka.

Shirkaas oo ka dhacay xarunta madaxtooyada Puntland, ayaa diiradda lagu saaray sida ay tahay xaaladda abaareed ee ka jirta Puntland iyo halka ay marayaan dadaallada socda.

Guddiga u xilsaaran gurmadka, ayaa soo bandhigay warbixin ka hadlsa dadaallada la sameeyay, waxayna sheegeen in abaartu aad u darantahay islamarkaana loo baahanyahay gurmad ka ballaaran kan hadda socda.

Madaxweynaha Puntland, ayaa kulankaas ka sheegay in dowladdu diyaar la tahay kaalinta kaga aadan gurmadka abaaraha, isagoo intaas ku daray mahadcelin uu usoo jeediyay xubnaha dadaalka wada ee howshaas loo xilsaaray.

Kulankan ayaa lagu soo beegay xilli abaarta ka jirta Puntland sare u kacday islamarkaana marayso heerkii ugu sareeyay, waxaana magaalooyinka waaweyn ee Puntland kasocda taakulayn ay wadaan culimada iyo dadweynaha qaybahooda kala duwan.

GAROWEONLINE