Ganacsatada oo soo dhoweeyey heshiis dhex maray PL iyo Jabuuti
-
- Posted On 31-03-2015, 04:10PM
March 31, 2015 (GO)- Ganacsatada Puntland ayaa soo dhoweeyey heshiis ganacsi oo dhowaan ay kala saxiixdeen dowladaha Puntland iyo Jabuuti.
Kulan ka dhacay maanta xarunta Rugta Ganacsiga iyo Wershedaha Puntland ee magaalada Bosaso ayaa heshiiskaas lagu taageeray.
Wasiirka Ganacsiga Puntland Maxamuud Xasan Soo-cadde, Hoggaanka Rugta Ganacsiga iyo tobannaan ganacsato ah ayaa kulanka kasoo qayb galay.
Ganacsatada qaar kamid ah oo goobta ka hadlay ayaa sheegay inay soo dhoweynayaan tallaabo kasta oo dowladdu qaaddo taasoo qayb ka qaadaneysa horumarinta ganacsiga iyo koboca dhaqaalaha.
Wafdi uu hoggaaminyo Madaxweyne ku-xigeenka Puntland oo bishan horraanteedii booqasho ku tegey dalka Jabuuti ayaa heshiis ganacsi oo dhinacyo badan leh lasoo saxiixdey dowladda Jabuuti.
Heshiiskaas waxaa qayb ka ahaa in ganacsatada Puntland badeecooyinkooda oo kunteenaro ku jira kala soo degaan dekedaha dalka Jabuuti.
GAROWE ONLINE
