Gollaha Wakiiladda Puntland oo laalay heshiis caalami ah

GAROWE, Puntland - Gollaha Wakiillada ayaa fadhigii shalay ku yeeshay Garowe uga dhawaaqay inuu laalay heshiis isafgarad ah, oo ay Puntland qeyb ka ahayd, oo maxaabiis burcad-badeed ah looga soo wareejiyay Seychelles.

Dawladda Federaalka, Midowga Yurub, deeq-bixiyaasha Caalamiga, Seychelles iyo Puntland ayaa ku heshiiyay 15-kii March, 2011 in burcad-badeeda la xukumay loo soo dhaweeyay qoysaskooda iyo eheladooda, iyagoo loo soo wareejiyay xabsiyo looga dhisay Puntland.

Baarlamaanka ayaa go'aamiyay in xabsiyadda laga sii daayo maxaabiista burcad-badeeda, kadib markii uu warbixin ka dhageystey Wasiirka Cadaaladda, Xeer-ilaaliyaha Guud ee Puntland iyo Taliye ku xigeenka Ciidanka Asluubta Puntland.

Fadhiga waxaa xaadir ku ahaa 37 mudane, oo 33 kamida ay cod gacan-taag ah ku taageeray in la laalo heshiiska, 3 Xildhibaan ayaa diiday, halka 1 ka aamusay, waxaana go'aanka ku dhawaaqay gudoomiye Cabdirashiid Yuusuf Jibriil.

Gollaha Wakiiladda ayaa sidoo kale sheegay in fulinta go'aanka loo xil-saarey gudi Xildhibaanno ah. Xukuumadda wali kama aysan hadlin qaraarka Baarlamaanka, oo u baahnaan doono inay dhinacyadii ku jiray heshiis maxaabiistii loogu heynayo Puntland inay isku raacaan.

GAROWE ONLINE