Guddoomiye ku-xigeenkii hore gobolka Bari oo la dilay
-
- Posted On 07-08-2017, 02:49PM
BOSASO, Puntland- Mallayshiyaad hubaysan ayaa magaalada Bosaso xarunta ganacsiga Puntland, maanta ku dilay Guddoomiye ku-xigeenkii hore ee gobolka Bari AUN, Khalar Ismaaciil Cabdulle (Buncun).
Marxuumka ayaa la dilay xilli uu ku sugnaa gudahan magaalada, waxaana dilkiisa kasoo baxaya warar is-khilaafsan iyadoo aysan jirin cid ay usoo qabteen falkan laamaha ammaanka gobolka Bari.
Lama oga sababta loo dilay, mas'uulka oo Guddoomiye ku-xigeen usoo noqday Guddoomiyihii hore ee gobolka Bari Cabdisamad Maxamed Gallan.
Dilka ayaa kusoo aaday xilli xisado ay ka taaganyihiin nawaaxiga magaalada Bosaso taasoo salka ku haysa arrimo deegaan.
Ciidamada ammaanka gobolka Bari ayaa sameeyay baaritaano ku aadan cidda ka dambaysay dilka Marxuum Buncun oo caan ka ahaan degmada Bosaso.
Ilaa hadda kiiskan kama aysan hadlin mas'uuliyiinta gobolka iyo degmada Bosaso.
Magaalada Bosaso oo dabayaaqadii sannadkii hore iyo horaantii sannadkan ay ka dhaceen dilal loo gaystay saraakiil katirsan dowladda ayaa xaaladeedu daganayn muddooyinkii dambe.
GAROWEONLINE
