Guddoomiyaha gobolka Bari oo gurigiisa la weerarey
-
- Posted On 26-02-2015, 07:11PM
BOSASO Feb 26,2015 ( GO)- Guddoomiyaha gobolka Bari Cabdisamad Maxamad Gallan ayaa caawa fiidkii waxaa gurigiisa weerartey dabley hubeysan oo aan heybtooda la garaneyn.
Dableyda oo ku hubeysneyd qoryaha darandooriga u dhaca iyo bumbooyinka gacanta ayaa guriga weerar gaadmo ah ku soo qaadey abaare 9:00pm fiidnimo ee caawa. Weerarka ayaa ku bilowdey labo qarax kadibna waxaa rasaas is-weydaarsadey muddo nus saac ah socotey ilaalada guriga iyo kooxda dableyda aheyd.
Inta la ogyahay weerarkaas waxaa ku geeriyoodey hal askari oo ka tirsan ilaalada Guddoomiyaha halka dhaawac culus kasoo gaarey mid kale kasoo lagu daweynayo waqtigaan isbitaalka guud ee Bosaso.
Weerarro noocaan ahaa oo asbuucyadii lasoo dhaafey ka dhacay magaalada Bosaso ayaa waxaa mas'uuliyaddooda horey u sheegtey ururka Al-shabaab kaasoo dagaal yahanadiisu fariisimo ku leeyihiin buuraleyda Golis.
Bisha Feb 7,2015 ayaa waxaa weerar kaas lamid ah lagu qaadey bar kontrool oo ilaalada taliye ku-xigeenka ciidamada Booliska u taaley afaafka hore ee Hotel Panorama ee magaalada Bosaso.
Taliye ku-xigeenka oo weerarkaas kaga dhinteen labo askari oo ciidamadiisa kamid ah ayaa wararka kasoo baxaya madaxtooyada Garowe sheegayaan in xilka laga qaadey xilli ku howlanaa sugidda amniga magaalada Bosaso.
Xil ka qaadista taliye ku-xigeenka Booliska iyo taliyaha ciidamada nabasugida Puntland ayaa abuurtey khilaaf xoogan oo u dhexeeya qaar ka tirsan saraakiisha iyo Madaxweyne Cabdiweli Cali Gaas.
Amniga magaalooyin waaweyn ee Puntland ayaa kasoo daraya tan iyo intii Cabdiweli Gaas talada Puntland la wareegey.
GAROWEONLINE
