Isbitaalka Badhan oo qalab caafimaad loogu deeqay
-
- Posted On 18-01-2015, 02:40PM
January 18, 2015 (GO)- Isbitaalka guud ee magaalada Badhan ayaa la gaarsiiyay qalab caafimaad oo ay ku deeqday hay'adda UNICEF.
Xildhibaan Cabdixakiim Dhooba-daareed iyo Xildhibaan Axmed Xaashi oo labaduba ka mid ah Barlamanka Puntland ayaa sheegay in qalabkaan uu baahi wayn uqabay isbitaalku, loona baahan yahay in bulshada loogu adeego.
Guddoomiyaha gobolka Sanaag Maxamuud Ciyoon oo ka hadlay munaasabaddii qalab wareejinta ayaa sheegay in uu ku faraxsan yahay qalabkaan ay xildhibaanadu dadaalka galiyeen, isagoo dhanka kale u mahadceliyey Hay'ada UNICEF ee qalabka keentay.
''waxaa runtii aad ugu faraxsanahay qalabkaan isbitaalka looga shaqayn doono oo bulshada loogu adeegayo...qalabkan waxaa iska leh bulshada gobolka Sanaag oo dhan waana in la dhowraa si fiicanna looga faa'iideystaa'' Guddoomiyaha gobolka Sanaag ayaa sidaas yiri.
Odayaashii iyo qaybihii kale ee bulshada ee joogay munaasabada qalabkaas lagu wareejinayay ayaa sheegay inay ku faraxsan yihiin qalabkan isbitaalka lasoo gaarsiiyey maadaama uu wax badan ka bedeli doono adeegyada caafimaad ee isbitaalkaasi bixiyo.
GAROWE ONLINE
