Kulan lagula xisaabtamayo xukuumadda Puntland oo Garowe ka furmaya
-
- Posted On 01-01-2016, 10:06PM
02 January, 2016(GO)-Waxaa magalada Garowe 02 January golaha xukuumadda Puntland uga furmaya shir dib loogu eegayo waxqabadka wasaaradaha sannadkii 2015 iyo qorshayaasha aan qabsoomin sababta u qabsoomi waayeen.
Shirka oo dhawr bari la qorsheeyay inuu socdo waxaa kasoo qayb gelaya Madaxweyne Cabdiweli Gaas iyo dhammaan xubnaha golaha wasiirrada oo iyagu mid mid uga warbixin doona waxqabadkooda sanadkan 2015 iyo waxyaabaha uga hirgalay qorsheyaalkii ay horay u dejiyeen.
Warbaahinta ayaa ka qayb geleysa kulanka waxaana si toos ah khudbadaha looga dhegeysan doonaa telefishinada iyo qaar kamid ah idaacadaha maxalliga ah gaar ahaan Radio Garowe.
Madaxweyne Cabdiweli Gaas wuxuu horay u sheegay inuu mid mid ula xisaabtami doono golihiisa wasiirrada isagoo lagama maarmaan ku tilmaamay in bulshada loosoo gudbiyo waxqabadka wasaarad kasta.
December 27, 2014, ayay ahayd markii Madaxweyne Gaas la xisaabtan ku sameeyay golihiisa xukuumadda iyadoo wasaaradduhu soo bandhigeen wixii u qabsoomay iyo caqabadaha soo wajahay.
La xisaabtanka ayaa ku soo beegmay xilli ay jiraan qorshayaal dhawr ah taasoo xukuumadda Madaxweyne Gaas ku hawllantahay, waxaana ka mid ah furitaanka garoonka diyaaraha magalada Bosaso, xuska 08 January oo ah markii dowladda hadda jirta la doortay iyo shirka 10 bishan ka furmaya magalada Kismayo ee looga hadlay habraaca doorashada Somalia.
Shirkan inta uu socdo khudbadaha, Sawirrada iyo warbixinnada waxaad kala socon doontaa Warsidaha Garowe Online.
GAROWEONLINE
