Madaxweynaha PL oo la kulmey wafdi ka socda Bankiga Adduunka
-
- Posted On 07-03-2015, 04:11PM
March 7, 2015 (GO)- Madaxweynaha Dawladda Puntland Cabdiweli Maxamed Cali Gaas ayaa maanta madaxtooyada Garowe ku qaabiley wafdi ka socday Bankiga Adduunka. Wafdigaas waxaa hoggaaminayey Mr. Thilasoni Benjamin Musuku oo ah mas'uulka Bankiga Adduunka u qaabilsan horumarinta mashaariicda ganacsiga gaarka loo leeyahay.
Madaxweynaha iyo waftiga ayaa ka wada hadlay arimo ay ka mid yihiin, horumarinta bankiga Puntland iyo kobcinta qaabka uu u shaqeeyo bankigu.
Waxaa sidoo kale laga wada hadlay sidii loo casriyeyn lahaa qaab xisaabeedka uu ku shaqeeyo Bankiga Puntland loona tayeyn lahaa shaqooyinka Wasaaradda Ganacsigu qabato gaar ahaan bixinta shatiyada ganacsiga.
Kullanka ayaa mudadii uu socday sidoo kale looga hadlay laguna falanqeeyey saamiga ay Puntland ka heli doonto deeq lacageed oo gaareysa soddon milyan oo doolar, lacagtaasoo Bankiga Dunidu ugu deeqay Soomaaliya oo dhan.
Bankiga Adduunka ayaa balan qaaday inay mashaariic badan ka hirgelin doonaan Puntland marka la gaaro bisha June ee soo socota.
Ma ahan markii ugu horreysey ee wafdi ka socda Bankiga Adduunku la kulmaan Madaxweynaha Puntland Cabdiweli Maxamed Cali Gaas.
GAROWE ONLINE
