Madaxweynaha Puntland oo Kismaayo u duuley
-
- Posted On 03-03-2015, 06:49AM
March 2, 2015 (GO)- Madaxweynaha Puntland Cabdiweli Maxamed Cali Gaas iyo wafdi uu hoggaaminayo ayaa maanta u dhoofey magaalada Kismaayo ee xarunta maamulka Jubaland.
Booqashadan oo qaadan doonta muddo saddex maalmood ah ayaa timid kaddib markii Cabdiweli Gaas casumaad rasmi ah ka helay dhiggiisa Jubaland Madaxweyne Axmed Maxamed Islaan (Madoobe).
Wafdiga Madaxweynaha waxaa ku jira wasiirro, xildhibaanno iyo madax dhaqameed.
Labada mas'uul ayaa bishii hore ee February magaalada Mudisho uga qayb galay shir afar-geesood ahaa kaasoo ay isugu yimaadeen madaxda dowlada dhexe iyo madaxweyneyaasha Puntland, Jubaland iyo Koonfur Galbeed.
Shirkaas oo fikirkiisa dowladaha qaybta ka ah federaalku la yimaadeen, waxaa markii hore qorshuhu ahaa in lagu qabto magaalada Kismaayo haseyeeshee mar dambe ayaa Muqdisho dib loogu soo wareejiyey.
Axmed Madoobe tan iyo markii Madaxweynaha loo doortey wuxuu Puntland booqasho ku yimid labo mar.
GAROWE ONLINE
