Madaxweynaha Puntland oo safar ku tagay Muqdishu
-
- Posted On 15-12-2016, 09:23PM
GAROWE, Puntland- Madaxweynaha Puntland Cabdiweli Maxamed Cali Gaas iyo wefti uu hogaaminayey ayaa maanta 15 December, 2016 galinkii dambe gaaray magaalada Muqdishu caasumadda Somalia.
Safarka oo ay ku weheliyaan xubno katirsan Barlamanka dhawaan la doortay, Xildhibaano katirsan kuwa Puntland iyo Wasiirro, ayaa salka ku haya ka qayb galka shirka madasha wadatashiga oo la filay inuu furmo 13-kii bishan.
Waxaa garoonka Aadan Cadde soo dhaweyn ugu sameeyay Ra'isal wasaare Cumar, wasiirro, Xildhibaan iyo madaxweyne ku-xigeenka Puntland muddo halkaas ku sugnaa.
Mar uu maanta warbaahinta kula hadlayay magaalada Garowe, wuxuu sheegay inuu Muqdishu u tagayo arrimaha doorashooyinka Somalia iyo sidii looga wada hadli lahaa arrimaha mugdigu ku jiro.
Waxaa la filayaa in maalmaha soo socda uu ku sugnaado Muqdishu, walow wararka qaybtood xusayaan inu halkaasi joogi doonto inta doorashada laga gaarayo.
Shirka madasha ee dhawaan furmi doona ayaa diiradda lagu saari doonaa arrimaha Aqalka sare gaar ahaan kuwa la siiyay gobollada Waqooyi oo ilaa hadda sumadooda mugdi ku jiro.
GAROWEONLINE
