Puntland oo cambaareysey weerarkii Central Hotel
-
- Posted On 21-02-2015, 04:53AM
February 21, 2015 (GO)- Dowladda Puntland ayaa si kulul u cambaareysey weerarkii is-miidaaminta ahaa ee Al-shabaab la beegsatay shalay oo Jimce ahayd hotelka Central ee magaalada Muqdisho.
Madaxweynaha Puntland Cabdiweli Maxamed Cali Gaas iyo ku-xigeenkiisa Cabdixakiim Camey oo xalay madaxtooyada Garowe war-fidiyeenka kula hadlay ayaa weerarkaas ku tilmaamay fal argagixiso.
"falkaasi fal argagixiso weeye, waxayna cadaynaysaa dabeecadda runta ah ee ay leeyihiin Al-shabab...Soomaali haddaan nahay waxaa nala gudboon inaan meel uga soo wada jeedsanno" Madaxweyne Gaas ayaa yiri.
Madaxweynuhu wuxuu dhanka kale tacsi u direy ehelada dadkii weerarkaas ku geeriyoodey isagoo inta dhaawaca ahna u rajeeyey caafimaad deg deg ah.
Weerarka waxaa ku geeriyoodey ugu yaraan labaatan iyo shan qof waxaa sidoo kale la xaqiijiyey inay ku dhaawacmeen ku dhowaad konton qof oo kale.
Dadka dhintey iyo kuwa dhaawacmay waxaa ku jira mas'uuliyiin dowladda ka tirsan, qaar horay xilal uga soo qabtey iyo siyaasiyiin caan ah.
GAROWE ONLINE
