Puntland oo gacanta ku dhigtay gaari siday waxyaabaha Qarxa [Sawirro]
-
- Posted On 11-02-2017, 09:08AM
GALKACYO, Puntland- Ciidamada amniga Puntland ayaa gacanta ku dhigay gaari noociisu yahay Waaraad oo lagasoo buuxiyay waxyaabaha qarxa kaasoo loo malaynayo inuu kayimid gobollada dhexe Somalia sida ay sheegeen saraakiil katirsan laamaha nabad galyada maamulkaasi.
Gaarigan oo gacanta lagu dhigay galinkii dambe shalay ayaa waxaa lagasoo buuxiyay, Biro, agabka Millatariga iyo waxyaabaha kale ee Qarax loo adeegsado.
Ciidanka ayaa baabuurkan gacanta ku dhigay xilli uu marayay deegaanka Bayra ee gobolka Mudug.
Afar ruux oo la tuhunsanyahay inay katirsanyihiin ururka Al Shabaab ayaa saarnaa gaarigan oo isticmaalayay waddooyin raf ah.
Wax faaf-faahin ah kamasoo bixin dowladda Puntland iyo maamulka gobolka Mudug, balse sawirro la baahiyay ayaa muujinaya tirada ragga saarnaa gaariga iyo agabka saarnaa.
Lama oga goobta uu kayimid iyo halka bartilmaameedku ahaa, balse qabashadiisa ayaa timid xilli gobolkaas amnigiisu soo hagaagayay muddooyinkii dambe.
Mid kamid ah ciidamadii qabtay baabuurka ayaa warbaahinta u xaqiijiyay in loo dhaadhiciyay xabsiga dhexe ee degmada Galkacyo halkaasoo lagu samaynayo baaritaan dheeraad ah.
Kooxda Al Shabaab ayaa sannadkii hore dhowr jeer qaraxyo mas'uuliyiin katirsan dowladda lagu dilay ka gaysatay degmada Galkacyo ee gobolka Mudug.
GAROWEONLINE
