Puntland: Wariye lagu xiray Boosaaso

BOSAASO, Puntland- Ciidamada ammaanka gobolka Bari ayaa xabsiga u taxaabay Wariye Cumar Maxamed Siciid (Cumar Dheere) oo kamid ah saxafiyiinta ka howlgala Puntland.

Wariyahan ayaa la xiray isagoo ku sugan Garoonka diyaaradaha Boosaaso isago sida la sheegay u tagay shaqo.

Lama oga sababta loo Xiray Cumar Dheere oo muddooyinkii dambe is-maandhaaf kala dhaxeeyay xukuumadda Madaxweyne Gaas hogaamiyo.

Warar ayaa sheegaya in Suxufigan uu u xiranyahay Guddoomiyaha Gobolka Bari, Yusuf Maxamed Wacays (Dhado).

Dowladdu kama hadlin xariga Cumar Dheere, balse Guddoomiyaha gobolka Bari oo lagu eedaynayo inuu Xabisay Wariyahan ayaa iska fogeeyay arrintaas.

Dhedo ayaa warbaahinta Gudaha u sheegay in Cumar Dheere lagu xiray Waaran Maxkamadeed oo dowladdu soo dacweysay.

Maaha markii ugu horaysay ee Cumar Dheere Xabsi la galiyo Sannadkan 2017 iyadoo bishii August lagu xiray Garoowe inkastoo Maxkamadda Darajada koowaad ay kusii daysay dammaanad Lix bari kadib iyadoo aan Maxkamad lasoo taagin.

Xariga iyo sii daynta noocaan ah ayaa muddooyinkii dambe caado ka noqotay Puntland.

GAROWE ONLINE