Puntland: Wasiir ku-xigeenka cadaaladda oo la dhaariyay
-
- Posted On 28-05-2016, 09:40AM
GAROWE- Waxaa maanta 28-May-2016 lagu dhaariyey madaxtooyada dawladda Puntland ee Garoowe wasiir ku-xigeenka wasaaradda Caddaadda Puntland Yuusuf Bootaan Ciise oo dhowaan xilkaasi u magcaabay Madaxweyne Cabdiweli Maxamed Cali Gaas.
Wasiir ku-xigeenka ayaa lagu dhaariyay xafiiska madaxweyne ku-xigeenka dowladda Puntland, Cabdixakiim Cabdulaahi Xaaji Cumar Camey, wuxuuna kula dar-daarmay Bootaan, in uu shaqadiisa daacadnimo u guto isla markaana la yimaado dedaal dheeraad ah si loo sii dar-dargeliyo arrimaha caddaaladda.
“waxaan kugula dar-daarmayaa sida aad u dhaaratay in aad xilkaaga u gudato, lana timaadid dedaal iyo daacadnimo dheeraad ah, isla markaana aad ka fogaatid waxkasta oo kaa weecinaya gudashada waajibaadkaaga, ”Ayuu yiri Madaxweyne ku-xigeenka Puntland, Camey.
Wuxuu sidoo kale EEBBE uga baryey mas'uulka in uu u fududeeyo xilka loo igmaday , isla markaana uu kadhigo mid wax badan kusoo kordhiya Wasaaradda Caddaaladda arrimaha diinta iyo dhaqan celinta Puntland.
Wasiirkan, ayaa badalaya wasiir ku-xigeenkii hore oo bilo ka hor xilkaasi iska casilay isagoo ku biiray Barlamanka Puntland.
GAROWEONLINE
