Qoys reer guuraa ah oo ku xoolo beelay miyiga degmada Jariiban
-
- Posted On 12-02-2015, 10:58AM
February 12, 2015 (GO)- Qoys reer guuraa ah oo ka kooban toban qof ayaa ku xoolo beelay miyiga degmada Jariiban ee gobolka Mudug kadib markii ay si khaldan dawada xoolaha u siiyeen 150 neef oo ari ah.
Aadan Cabdi Aadan (Qol-yare) waa aabaha qoyska cayroobey, wuxuuna Radio Garowe u sheegay in isagu xoolaha dawada siiyey si uu uga dabiibo (Dhabiijo) oo ah nooc kamid ah dulinka xoolaha dhogortooda gala.
Xoolaha dawada la siiyey oo tiradoodu ahayd 150 neef waxaa isla markaasba bakhtiyey 123 halka 27da neef ee hartey yihiin kuwo aan wax badan ku nooleyn.
Qol-yare oo la weydiiyey sababta xooluhu u dawada ugu le'deen, wuxuu sheegay in uu si xad dhaaf ah dawada u siiyey maadaama uusan aqoon fiican u lahayn nooca dawada uu isticaamley iyo weliba qaabka xoolaha loo siiyo midna.
" walaalow xoolaha anaa dawada siiyey waxan rabey inaan Dhabiijo ka daweeyo...wax kasta oo dhacay inkastoo ay qornaayeen hadana sababteeda anaa lahaa oo aqoonyari iyo indho adeyga reer miyiga ayaa iigu wacnaa" ayuu yiri.
Aadan Qol-yare, wuxuu ugu dambeyntii ka codsaday dadka Soomaaliyeed inay usoo gurmadaan maadaama xilligan la joogo qoyskiisu cayr yihiin islamarkaana haysan xoolo ay noloshooda ku maareeyaan.
Boqollaal qof iyo kumanaan xoolo ah ayaa sanad walba ugu geeriyooda dalka Soomaaliya sababta dawooyin dhacay amase si khaldan loo isticmaaley.
GAROWE ONLINE
