Ra'isal Wasaare Sharma'arke oo Garowe kusoo wajahan
-
- Posted On 07-04-2015, 06:23PM
April 7, 2015 (GO)- Ilo wareedyo lagu kalsoon yahay ayaa Garowe Online u xaqiijiyey in Ra'isal Wasaaraha Dowladda Federaalka Soomaaliya Cumar Cabdirashiid Cali Sharma'arke todobadkan kusoo wajahan yahay magaalo madaxda Puntland ee Garowe.
Ra'isal Wasaaraha waxaa soo raaci doona qaar kamid ah wasiirrada iyo xildhibaannada kasoo jeeda Puntland. Diyaar garow xooggan oo ku aaddan soo dhoweynta wafdigaas ayaa Garowe ka socda.
Cumar Cabdirashiid muddada uu Garowe ku sugan yahay wuxuu la kulmi doonaa madaxda Puntland, isimadda iyo qaybaha kala duwan ee bulshada.
Booqashadan ayaa noqoneysa tii ugu horreysey ee Cumar Cabdirashiid Cali Sharma'arke ku yimaado Puntland laga soo bilaabo markii xilka ra'isal wasaaraha loo soo magacaabey Dec 17, 2014.
GAROWE ONLINE
