Shirka dib u eegista waxbarashada PL oo Garowe ka furmey
-
- Posted On 15-03-2015, 01:51PM
March 15, 2015 (GO)- Madaxweynaha Dawladda Puntland Cabdiweli Maxamed Cali Gaas ayaa maanta furey shirweynaha labaad ee dib u eegista waxbarashada Puntland.
Munaasabadii lagu furayey shirkan waxaa kasoo qayb galay Wasiirka Waxbarashada Dawladda Federaalka Khadro Bashiir Cali, xubno ka tirsan golaha wasiirrada Puntland, xildibaano, bahda waxbarashada Puntland iyo saraakiil ka socdey hay'adaha dhanka waxbarashada kala shaqeeya Puntland.
Madaxweynaha oo si kooban furitaanka shirka uga hadlay ayaa Wasaaradda Wabarashada iyo Tacliinta Sare ee Dawladda Puntland ku ammaanay horumarka ay dhanka tayeynta waxbarashada ka gaartey.
"Runtii wasaaradani waxay noo tahay wasaarad ku dayasho mudan marka la eego shaqada ay hayso iyo guusha ay u soo hoysay Puntland, waana ku mahadsan yihiin halka wanaagsan ee ay maanta gaareen" ayuu yiri.
Dhanka kale, Gaas ayaa sheegay in ay muhiim tahay xukuumadda iyo ganacsataduba inay iska kaashadaan sidii fursado shaqo loogu abuuri lahaa dhallinyarada wax baratay ee shaqo la'aantu hayso.
Shirweynaha labaad ee dib u eegista waxbarashada Puntland ayaa soo xirmi doona maalinta berri ah, waxaana si qoto dheer loogu falanqeynayaa caqabadaha ka jira dhanka waxbarashada iyo sidii loo kordhin lahaa tayada waxbarashada deegaanada Puntland.
GAROWE ONLINE
