Tifatirihii shabakadda Shacabka Media oo Garowe lagu xiray
-
- Posted On 21-01-2015, 11:31AM
January 21, 2015 (GO)- Ciidamada booliska ee Garowe ayaa xalay xabsiga u taxaabay Xuseen Yaasiin Godo Godo oo ah tifatiraha shabakada Shacabka Media.
Ninkan oo dhowaan Garowe soo gaarey, wuxuu kamid yahay qurbe-joogta reer Puntland ee kasoo jeeda gobolka Mudug.
Dowladu xarigiisa wax war ah weli kama soo saarin, waxaana socda dadaal ururka saxafiyiinta Puntland ee MAP ku doonayo in ninkaas dib xoriyaddiisa loogu soo celiyo.
Arintan ayaa kusoo aadeysa xilli marba marka ka dambeysa uu soo kordhayo walaaca laga muujinayo qaabka dowladda Puntland ee Madaxweyne Gaas hoggaamiyo ula dhaqmeyso warbaahinta.
Bishii December ee lasoo dhaafay ayey ahayd markii ururka wariyeyaasha aan xuduudka lahayd ee RWB sheegay in caburis lagu hayo bahda warbaahinta Puntland iyo weliba siyaasiyiinta mucaaradka.
Qoraal kasoo baxday xafiiska madaxtooyada Puntland u qaabisaln saxaafada September 20, 2014, waxaa lagu amray shirkadda isgaarsiinta ee Golis inay hawada ka saarto lix mareegood oo Garowe Online kamid tahay.
GAROWE ONLINE
