Wasaaradda Gaadiidka Puntland oo bedeleysa taarikada baabuurta
-
- Posted On 09-03-2015, 05:35AM
March 9, 2015 (GO)- Wasaaradda Hawlaha Guud iyo Gaadiidka Puntland ayaa shaacisey in la bedeley taarikadii hore ee lagu xiri jirey gaadiidka.
Wasiir ku-xigeeka wasaaradda Cabdiraxmaan Yuusuf Dujaana oo Garowe shir-jaraa'id ku qabtey ayaa sheegay in taarikadii hore lagu bedeley mid cusub oo qaab ahaanna tii hore ka duwan.
"taarikadan waxaa lagu xirayaa baabuurta cusub ee xilligan dekedda kasoo degta, kuwii hore sidoodii ayey ahaaneysaa...taarikadan cusub waxay ka duwan tahay tii hore oo waxay ka kooban tahay lambarro iyo xuruuf isku jirta" ayuu yiri.
Dujaana oo la weydiiyey sababta xilligan kusoo beegtay bedelista taarikada, wuxuu ku sababeeyey labo arrimood oo kala ah: sugidda ammaanka iyo in gaadiidka duugga ah dadka lagu khaldin iyadoo laga dhigayo mid cusub.
In ka badan afartan kun oo gaari ayaa ka diiwaan gashan Wasaaradda Hawlaha Guud iyo Gaadiidka Puntland, waxaana dhacda in mararka qaar hal gaari isticmaalo taarikooyin badan.
GAROWE ONLINE
