Wasiirka Duulista PL oo ka warbixiyey qandaraaska Garowe Airport
-
- Posted On 25-03-2015, 05:17PM
March 25, 2015 (GO)- Wasiirka Duulista Hawada iyo Garoomada Puntland Xasan Xaaji Siciid oo waraysi gaar ah siiyey Radio Garowe ayaa ka warbixiyey halka uu marayo qandaraaska lagu dhisayo garoonka diyaaradaha ee Garowe iyo Jaamacadda Badhan.
Wasiirku wuxuu sheegay in March 23, 2015 magaalada Dubai ee dalka Imaaraadka Carabta lagu daah furey wejiga labaad ee qandaraaska oo ay ku tartamayaan afar shirkadood.
Dukumiintiyada shirkadaha ayuu sheegay in si qoto dheer loo baari doono islamarkaana dhowaan la shaacin doono shirkadda guuleystey.
Wasiirka oo sidoo kale Radio Garowe weydiisey shuruudaha lagu xulanayo shirkadda guuleysatay, wuxuu sheegay inay kamid yihiin:
- Inay soo dhameystirto dhammaan shuruudaha qandaraaska.
- Inay dhaqaale haysato.
- Leedahay khibrad shaqo oo fiican.
- Haysato qalab iyo xirfadleyaal tayadoodu sarreyso.
- Awoodina karto inay shaqada bilowdo xilli kasta.
Afarta shirkadood ee tartamaya waxaa labo kamid ah laga leeyahay dalka China labada kalena wuxuu fadhigoodu yahay dalka Turkey.
Maalgalinta dhisamaha garoonka diyaardaha Garowe iyo Jaamacada Baran ayaa waxaa ku deeqey hay'adda Kuwait Fund.
Saddexda asbuuc ee soo socda gudahooda ayaa la filayaa in la shaaciyo magaca shirkadda ku guuleysatey qandaraaska.
GAROWE ONLINE
