Xildhibaan Garowe lagu doortay
-
- Posted On 31-01-2017, 01:03PM
GAROWE, Puntland- Kursi kamid ahaa 11-kii xubnood ee ay soo celiyeen guddiga khilaafaadka doorashada Somalia ayaa maanta mar kale lagusoo xulay magalada Garowe.
Xildhibaanka Barlamanka Federaalka Somalia u matalaya beesha Ugaas Saleebaan ayaa waxaa horay guddigu u sheegeen in doorashadiisa loo maray qaab musuq-maasuq ah iyadoo la codsaday in mar kale lagu soo doorto deegaanada Puntland.
Doorasho saaka ka dhacday Xarunta Jaamacadda PSU ee caasumadda Growe, waxaa mar kale ku guulaysatay Cabdi Maxamuud Maxamed, oo horay booskan ugu guulaystay kahor intaan lasoo celin.
45 cod ayuu ka helay Ergadii dooranaysay isagoo ka guulaystay murashax lagu magacaabo Maxamed Cali Madoobe.
Khilaaf xoog leh ayaa muddooyinkii dambe ka taagnaa kursigaas iyadoo shalay Odoyaasha beeshaas soo saareen war-saxaafadeed ay kaga digayaan in musuq-maasuq kursigooda loo adeegsado.
Eedayn xoog leh ayay usoo jeediyeen guddiga doorashada heer Puntland iyagoo ku dhaliilay inay ergo aan matalin beesha u xareeyeen murashax gooni ah.
Guddigu wax war ah kama soo saarin arrintaas.
Balse tallaabada maanta waxaa soo dhaweeyay qaar kamid ah odoyaasha Ugaar Saleebaan.
Guddiga doorashada Somalia, ayaa horay go'aan ugu gaaray in beel kasta oo kursigooda la celiyo kusoo dooran doonaan qaabkii hore iyadoo soo xulistu ka dhici doono meeshii horay loogu qabtay islamarkaana u codayn doonaan 51 Ergo.
GAROWEONLINE
