Dowladda Itoobiya oo amaantay doorashadii Somaliland
-
WARIYAHA HARGEYSA GAROWE ONLINE
- Posted On 15-11-2024, 01:29PM
HARGEYSA, Somaliland - Dowladda Itoobiya ayaa bogaadisay doorashadii madaxtinimada ee toddobaadkan ka dhacday Somaliland.
War-saxaafadeed ka soo baxay Wasaaradda Arrimaha Dibadda Itoobiya, ayaa lagu sheegay inay shacabka Somaliland ku hambalyeysay sida nabad-gelyada iyo dimuqraadiga ah u dhacday ee doorashadu u dhacday.
War-saxaafadeedku waxa kale oo lagu ammaanay Komishanka Doorashooyinka Somaliland sida ay u qabteen doorasho xor iyo xalaal ah.
“Hannaankani waxa uu ka tarjumayaa bisaylka dawladnimada iyo nidaamka dimuqraadiyadeed ee Somaliland,” ayaa lagu soo gunaanaday war-murtiyeedka.
Horaantii sanadkan, Itoobiya iyo Somaliland waxay kala saxiixdeen heshiis is-afgarad ah (MOU) kaas oo Somaliland ku siinaya aqoonsi ay ku kireynayso 20km oo badda ah, sida ay sheegeen masuuliyiinta Somaliland.
Is-fahamkaas ayaa lagu cambaareeyay in uu ku xad-gudbay qaranada Soomaaliya oo u aragta Somaliland qayb ka mid ah dhulkeeda. Somaliland iyo Itoobiya way difaaceen heshiiska.
GAROWE ONLINE
