Pezeshkian: Iran Isma Dhiibeyso, Mana Aqbalayso Cadaadis iyo Cagajugleyn

NEW YORK — Madaxweynaha Iran Masoud Pezeshkian ayaa Mareykanka uga digay in Iran aan lagu qasbi karin hanjabaad ama adeegsi xoog ah, isagoo sheegay in dalkiisu diyaar u yahay wada-hadal iyo diblomaasiyad.

Masoud Pezeshkian ayaa sheegay in iska-caabbinta Iran ay sii xoogeysan doonto marka la kordhiyo cunaqabateynta, isagoo adkeeyay in dalkiisu uusan marnaba madaxa hoos u dhigi doonin ama u jilba-jabsan doonin cadaadis.

Pezeshkian ayaa sheegay in Iran ay weli diyaar u tahay wada-hadal iyo diblomaasiyad si khilaafaadka loo xalliyo, balse aysan aqbalayn in lagu qasbo luuqadda xoogga.

Pezeshkian oo khudbad ka jeediyay Golaha Guud ee Qaramada Midoobay ayaa sheegay in Iran ay diyaar u tahay wada-xaajood lagu xalliyo khilaafaadka, balse aysan aqbalayn in wada-hadalka lagu saleeyo cadaadis iyo xoog.

Madaxweynaha Iran ayaa hadalkiisa jeediyay xilli xiisadda u dhaxaysa Tehran iyo Washington ay weli taagan tahay, gaar ahaan arrimaha la xiriira barnaamijka nukliyeerka Iran.

Dhanka kale, Xoghayaha Arrimaha Dibadda Mareykanka Marco Rubio ayaa sheegay in heshiis lala gaaro Iran uu u baahan yahay dadaal dheer iyo wada-hadallo joogto ah.

Rubio ayaa sidoo kale sheegay in Mareykanku weli doorbidayo xal diblomaasiyadeed, balse xulashooyinka militari ay weli miiska saaran yihiin haddii aan heshiis laga gaarin khilaafka.

Khudbadaha labada dhinac ayaa kusoo beegmaya iyadoo madaxda dalalka caalamka ay ku sugan yihiin New York, halkaas oo uu ka socdo kalfadhiga 81-aad ee Golaha Guud ee Qaramada Midoobay.

Iran ayaa muddo dheer ku adkaysanaysay in khilaafaadka caalamiga ah lagu xalliyo wada-hadal iyo diblomaasiyad, halka Mareykanka iyo dalal kale ay walaac ka muujiyeen barnaamijka nukliyeerka Tehran.

GAROWE ONLINE