Bosaso: niman khamri lagu soo qabtay oo la xukumay
-
- Posted On 13-10-2014, 08:29AM
October 13, 2014 (GO)- Maxkamadda darajada koowaad ee gobolka Bari waxaa maanta la horkeenay saddex nin oo ku eedeysnaa inay maandooriyaha khamriga ka ganacsanayeen.
Saddexda nin ciidamada booliska ayaa shan beri kahor kantaroolka magaalada Bosaso ku qabtay xilli ay 45 dhalo oo khamri ah doonayeen inay qaab qarsoodi ah kusoo geliyaan magaalada Bosaso.
Maxkamaddu waxay midkiiba ku xukuntay xarig mudadiisu tahay hal sano, mana ahan markii ugu horeysey ee dad khamri lagu soo qabtay maxkamadda derejeda koowaad ee gobolka Bari xukunto.
Taliska ciidamada booliska Bari ayaa bishan October horraanteedii shaaciyey in boolisku laban laabi doono hawlgallada lagula dagaalamayo maandooriyaha khamriga oo khatar ku ah anshaxa suuban iyo ammaanka bulshada labadaba.
Xukunkan ayaa kusoo aadaya xilli sidan oo kale maanta maxkamadda ciidamada qalabka sida ee Puntland xukuno kala duwan ugu ridey lix qof oo ku eedeysnaa inay ka tirsan yihiin Al-shabab qaybna ka qaateen falal amaan darro ah oo Puntland laga geystey.
Khamriga oo ah maandooriye xaaraan ah marka laga eego dhanka sharciga Islaamka aadna u dhibaateeya nolosha qofka caba iyo bulshadaba, wuxuu badankiisu Soomaliya uga yimaadaa dalalka deriska ah gaar ahaan Ethiopia.
GAROWE ONLINE
