Dad ku dhintay rasaasayn ka dhacday Cusbitalka Galkacyo
-
- Posted On 14-11-2015, 09:05PM
14 Novembar, 2015(GO)-Wararka ka imaanaya magalada Galkacyo xarunta gobolka Mudug, ayaa sheegaya in goordhaweyd la xabadeeyay gaari nin dhaawaca waday oo ku wajahnaa cusbitalka weyn magalada Galkacyo.
Goobta rasaasayntu ka dhacday waxaa ilaalo ka hayay ciidamada dowladda kuwaasi oo waardiyaynayay askar ku dhaawacantay dagaal maanta ka dhacay goob geerash oo ku dhaw dugsiga Yameyska.
Khasaaro dhimasho iyo dhaawac isugu jira ayaa la soo sheegayaa, waxaana falkaasi dhacay kadib markii gaariga dhaawaca waday uu xawli ku soo galay cusbitalka.
Afar qof ayaa dhintay, lix kalena waa ku dhaawacantay siday noo xaqiijiyeen ilo lagu kalsoonyahay oo ku sugan magalada Galkacyo.
Ilaa hadda ma jiro faah faahin rasmi ah oo laga helayo shilkaas khasaarahiisu inta uu le'egyahay iyo halka xaalku ku dambeeyay.
GAROWEONLINE
