Deni oo baaq u jeediyey Hogaanka Dhaqanka gobolka Bari

GAROWE, Puntland - Madaxweyne Deni ayaa shalay Qado Sharaf ugu sameeyay degaanka Jibigalle ee duleedka Garoowe, qaar ka mid ah Hogaanka dhaqanka ee Gobolka Bari oo ku sugnaa caasimada.

Kulanka waxaa ka qeybgalay Guddoomiyaha Golaha Wakiiilada, qaar ka mid ah labada Gole ee Dowladda, Saraakiil Madaxtooyo, Hoggaanka Dhaqanka, Ganacsato iyo marti sharaf kale.

Deni ayaa bogaadiyey kaalinta muhiimka ah ee hoggaanka dhaqanku ku leeyihiin Dhismihii iyo illaalinta jiritaanka Puntland.

Madaxweynaha ayaa kula dardaarmay in ay halkaasi hore ugasii wadaan kana shaqeeyaan nabadgelyada, midnimada iyo horumarka Puntland.

"Hoggaanka Puntland wuxuu ku dhisan yahay waa hoggaanka siyaasadeed ee maamulka markaas la doorto iyo isimmada oo u ah asaas iyo meel loo laabto," ayuu yiri.

Wuxuu ku daray: "Labadaas hay’adood oo runtii is kabaya, waxay ka mid yihiin nimcooyinka Ilaahay uu ina siiyey, oo u baahan in la ilaaliyo".

Hogaanka Dhaqanka ee Gobolka Bari ayaa Madaxweynaha uga mahadceliyey qado sharafta iyo is-xog-wareysiga,

Ugu dambeyntii, waxay carabka ku adkeeyeen in marwalba dhaqanku garab taagan yihiin dowladdooda, illaalinta nabadgelyada iyo horumarka guud ahaan degaanada kala duwan ee hoos-yimadda Puntland.

GAROWE ONLINE