Dowladda PL oo ka tacsiyeysey geerida Ugaas Axmed Ugaas Maxamed
-
- Posted On 09-11-2014, 03:30PM
November 9, 2014 (GO)- Dowlada Putland ayaa ka tacsiyeysey geerida Ugaas Axmed Ugaas Maxamed oo ku geeriyoodey degmada Gal-dogob ee gobolka Mudug.
Wasiirka War-faafinta Puntland Cabdiweli Xirsi Cabdule Indhoguran oo la hadlay Radio Garowe ayaa dhammaan dadka Soomaaliyeed gaar ahaan kuwa reer Putland uga tacsiyeeyey geerida ugaaska.
Wuxuu sidoo kale si gaar ah ugu tacsiyeeyey ehelada marxuumku ka baxay, isagoo Ilaah uga baryey inuu janadiisa ka waraabiyo dhammaan qaraabada uu ka tegeyna samir iyo iimaan ka siiyo.
Dhanka kale Wasiirka Waxbarashada Puntland Cali Xaaji Warsame ayaa isna ka tacsiyeeyey geerida ugaaska, isagoo sheegay in Ugaas Amed Ugaas Maxamed ahaa shaqsi qiime weyn ugu fadhiyey dadka reer Puntland iyo guud ahaan Soomaalida.
Ugaaska oo ahaa isimka guud ee baalaha Leel-kase waxaa maalinta berri ah lagu aasi doonaa isla degmada Gal-dogob, iyadoo aaskiisana kasoo qayb geli doonaan madaxda ugu sareysa Dowlada Puntland.
GAROWE ONLINE
