Fahfaahin: Khasaaraha Qaraxii Boosaaso oo kordhay [Dhageyso]

BOOSAASO, Puntland - Fahfaahin dheeraad ah ayaa kasoo baxaysa qarax saaka ka dhacay magaalada Boosaaso, ee xarunta gobolka Bari kaasi oo lala eegtay Askar katirsan ilaalada Madaxtooyada Puntland.

Sida Warsidaha Garowe Online ay u xaqiijiyeen Sarakiisha ciidamada amniga Boosaaso ugu yaraan 8 ruux, oo lix kamid ah ay yihiin Askar ayaa ku dhaawacmay qaraxa oo ka dhacay wadada Netko, oo kamid ah meelaha ugu mashquulka badan magaalada.

Qaraxan ayaa ka dhashay miino dhulka lagu aasy oo lala eegtay ciidamo ka tirsan Puntland, kuwaasi oo wadada xiray weerarka kadib, iyadoo wararku ay sheegayaan in rasaas ay rideen ay dhowr qof oo shacab ah ku dhaawacmeen.

Askarta dhaawacmay waxaa ku jira saddex Askari oo dhaawacoodu uu culus yahay, kuwaasi oo la dhigay Isbitaalka guud ee magaalada, sida uu GO u xaqiijiyay mid kamid ah howlwadeenada caafimaad. Halkan ka akhri.

Duqa degmada Boosaaso Yaasiin Mire oo goobta gaarey ayaa ka hadlay qaraxa, isagoo xaqiijiyay in lala eegtay ciidamo howlgal shaqo ku jiray abaare 8:40 a.m. subaxnimo waqtiga Soomaaliya, wuxuuna xaqiijiyay in lix Askari iyo labo Shacab ah ay ku dhaawacmeen.

Kooxda Al Shabaab ayaa sheegatay mas'uuliyadda qaraxa Boosaaso uu kusoo beegmaya, xilli uu xiran yahay maalintii labaad Ganacsiga magaalada, sababo la xiriira khilaaf xal loo waayay oo u dhaxeeya dowladda iyo Gancsatada kaasi oo ku qotama Tariifo lagu kordhiyay Khidmada Badeecooyinka Dekedda kasoo daga. Halkan ka akhri.

Khilaafka ka taagan hadda Dekedda waxa uu caqabad ku yahay dhaqan-galka Heshiiskii dowladda Puntland la gashay bishii April ee sanadkan Shirkadda laga leeyahay Imaaraadka ee P&O Ports taasi oo maalgelin ku kacaysa 336 Milyan oo Doolar, lacagtaasi oo lagu ballaarinayo furdada.

GAROWE ONLINE