Gaalkacayo: labo baalleyaasha cadceeda ku shaqeeya ah oo la qarxiyey
-
- Posted On 21-11-2014, 12:00PM
November 21, 2014 (GO)- Labo kamid ah baalleyaasha layrka ku shaqeeya cadceeda ee dhowaan lagu xiray jidka aada garoonka diyaaradaha magaalada Gaalkacayo ayaa burburay kadib markii la qarxiyey goor hore oo saaka ahayd.
Qaraxa marka laga reebo labada baalle ee uu dhulka dhigay ma jirto khasaare kale oo ka dhashay. Booliska oo goobta soo gaarey ayaan ku guuleysan inay falkaas cidna usoo qabtaan.
Ammaanka magaalada Gaalkacayo ayaa soo xumaanayey todobaadyadii u dambeeyey, waxayna arintani kusoo aadeysaa saddex maalmood kadib markii isla magaaladaas lagu diley Weriye Cabdirisaaq Cali Cabdi Silver.
Agaasimaha Hay'adda Sirdoonka Puntland Cabdi Xasan Xuseen (Cabdi Yare) oo shalay magaalada Garowe shir-jaraa'id ku qabtay, wuxuu sheegay in la bilaabayo hawlgal baahsan oo ammaanka lagu xaqiijinayo islamarkaana lagu qabqabanayo xubno ka tirsan Al-shabaab oo si dhuumaaleysi ah kusoo galay Puntland.
GAROWE ONLINE
