Maamulka gobolka Nugal oo waddooyin baneeyay degmada Burtinle
-
- Posted On 12-11-2015, 04:51PM
12 November, 2015(GO)-Maamulka gobolka Nugal, ayaa degmada Burtinle ka wada barnaamijyo lagu hormarinayo degmadaasi, waxaana la billaabay bur-burtinta gurhayaha sida sharci darrada u dhisan.
Barnaamijkan, ayaa looga dan leeyahay sidii degmada Burtinle loogu samayn lahaa waddoyin laami la saaro, kuwaasi oo qayb ka noqonaya mashruuca hormarinta degmooyinka Puntland ee JPLG.
Shacabka guryahoodii la dumiyay, ayaa soo dhaweyay tallaabadan, waxayna ku sheegeen inay tahay mid danahooda lagu hormarinayo, waxayna shacabka kale ugu baaqeen inay u hogaansamaan amarka dowladda.
Maamulka ayaa sidoo kale baneeyay xirmo daaqsimeedyo laga sameeyay degmada,waxana arrintaasi gacan ka gaystay shakhsiyaadka markii hore ootay, kuwaasi oo xusay inay ka tanaasuleen.
Gudoomiyaha gobolka Nugal Cumar Cabdullaahi, ayaa shacabka degmada Burtinle ku amaanay kaalinta ka qaateen hormarinta deegaankooda, wuxuuna xusay inaysan jiri doonin dhul la xirmaysto degmadaasi.
Dhawaan ayay ahayd markii degmada Burtinle loo dhisay maamul cusub, ka dib markii golihii hore la kala diray.
GAROWEONLINE
