Dhageyso: Kulan dhexmarey markale Puntland iyo Galmudug
-
- Posted On 04-12-2015, 01:12PM
04 December, 2015(GO)-Waxaa maanta mar kale garoonka diyaaradaha Cabdullaahi Yusuf ee Galkacyo lagu qabtay kulan u dhaxeeya Madaxda Puntland iyo Galmudug oo weheliyaan saraakiisha ciidamada is horfadhiya ee ku sugan xarunta gobolka Mudug.
Kulanka labada dhinac, waxaa ku soo biiray culimaa'udiinka labada dhinac, kuwaasi oo uga waramay mas'uuliyiinta cawaaqib xumada ka dhalan karta Aakhiro iyo Adduunka qofkii dila qof muslim ah.
Dowladda Federalka iyo maamulka Jubabaland aya arrintan dhexdiyaal ka ah, waxayna rajo wanaagsan ka muujiyeen inay hirgalin doonaa hishiisyada labada maamul kala saxiixdeen.
Shirkan ayaa saxaafaddu dibad joog ka ahayd, waxaana waxyaabihii ka soo baxay warbaahinta uga waramay Wasiirka Wasaaradda Arrimaha Gudaha Federalka Somalia Cabdiraxmaan Odowaa, isagoo tilmaamay in dhammaan ujeedkii shirka la isku afgartay.
Odowaa ayaa sidoo kale xusay, in galabta la kala qaadayo ciidamada labada maamul isla markaan Madaxdu tagi doonaan meelaha ciidamadu isku horfadhiyaan.
Arrintan ayaa imaanaysa xilli shalay magalada ka dhacay dagaal sababay dhimasho iyo dhaawac ka dib hishiis lagu kala saxiixday garoonka diyaaradaha Cabdullaahi Yuusuf.
GAROWEONLINE
