Madaxweyne ku-xigeenka oo ka qayb galay isu-soobaxa Bosaso
-
- Posted On 25-02-2016, 04:06PM
BOSASO- Madaxweyne ku-xigeenka Dawladda Puntland ahna kusimaha Madaxweynaha Eng.Cabdixakiim Cabdulaahi Xaaji Cumar Camey ayaa maanta 25-Feb-2016 waxaa uu magaalada Boosaaso ee xarunta gobolka Bari kaga qayb galay isu-soobax roobdoon ah, kaas oo EEBBE lagaga baryayey in uu ka dulqaado abaaraha saameyey guud ahaan ummadda Soomaaliyeed gaar ahaan reer Puntland isla markaana ugu beddelo raxmaadkiisa khayrka qaba.
Isu-soo baxaas roob doonta oo ah oo lagu qabtay garoonka kubbadda cagta ee Boosaaso ayaa waxaa sidoo kale kasoo qayb galay Wasiiro, Xildhibaano, Isimo maamulka gobolka Bari iyo kan degmada Boosaaso, culumaa’udiin iyo kumannaan dadweyne ah, kuwaas oo dhammaantood isugu soo baxay siday ilaahay uga baryi lahaayeen inuu ka feydo abaaraha dabada dheeraaday ee ka jira Puntland.
Madaxweyne ku-xigeenka Dawladda Puntland Cabdixakiim Cabdulaahi Xaaji Cumar Camey oo la hadalayey kumannaankii dadweynaha ahaa ee isu soo baxa roobdoonta kasoo qayb galay ayaa kula dardaarmay inay ilaahay u toobad keenaan, isla markaasna cafis weydiistaan si uu ugu naxariisto.
Camay, ayaa sidoo kale ku boorriyey guud ahaan shacabka Puntland inay isu naxariistaan isla markaana ka fogaadaan waxyaabaha macsida ee keenaya carada ALLE.
Ku-xigeenka Madaxweynaha, ayaa sidoo kale Ilaahay uga baryey guud ahaan ummadda Somaliyeed gaar ahaan kuwa Puntland meelkastoo ay joogaan inuu uga gar-gaaro abaaraha ba’an ee waxyeelleeyey dadkii iyo duunyadiiba, isla markaasina uu ka waraabiyo raxmaadkiisa khayrka qaba.
Isu-soobaxan maanta lagu qabtay Bosaso, ayaa ahaa mid hore u iclaamisey Wasaaradda Caddaaladda Puntland in uu ka qabsoomo dhammaan gobollada Puntland.
GAROWEONLINE
