Madaxweyne ku-xigeenka Puntland oo ka hadlay shaqaaqadii Buuhoodle
-
- Posted On 23-12-2015, 01:29PM
23 December, 2015(GO)-Madaxweyne ku-xigeenka Puntland Cabdikiim Cabdullaahi Cumar Camay ayaa ka hadlay xiisad dagaal dhawaan ka dhacday deegaano ku dhow degmada Buuhoodle gobolka Cayn, wuxuuna sheegay arrintaasi inay la xiriirtay xuduudda Puntland iyo Ethopia.
Camay ayaa xaaladdaasi ka hadlay xilli maanta dib ugu soo laabtay magalada Garowe caasumadda Puntland, wuxuuna sidoo kale ka waramay safarkiisa degmadaas.
Ku-xigeenka Madaxweynaha Puntland ayaa tilmaamay in isaga wafdigiisa xarunta gobolka Cayn u tageen arrimo la xiriira tacsi kadib dhimashadii Hooyadii.
Waxaa uu tilmaamay inay gacan ka gaysteen qaboojinta dagaalka isaga iyo qunsulka Ethopia u fadhiya Puntland kaaso tagay magalada Buuhoodle, wuxuuna xusay in xaaladdu meel wanaagsan marayso.
Dhawaan ayay ahayd markii dagaal khasaaro badan dhaliyay uu ka dhacay deegaamo yar yar oo hoos yimaada xarunta gobolka Cayn, waxaana waqtigaas degmada ku sugnaa Eng: Camay iyo wafdigiisa.
GAROWEONLINE
