Puntland: Madaxweyne ku-xigeenka oo la shiray Ganacsato
-
- Posted On 27-02-2016, 04:40PM
BOSASO- Madaxweyne ku-xigeenka Puntland Cabdixakiim Cabdulaahi Xaaji Cumar Camey ahna guddoomiyaha guddiga abaaraha ee oo uu wehelinayo Guddoomiyaha Golaha Wakiillada Dawladda Puntland Axmed Cali Xaashi ayaa maanta 27-Feb-2016 xarunta Madaxtooyada Bosaso kula kulmay ganacsatada reer Puntland ah.
Madaxweyne ku-xigeenka Puntland ayaa kala hadlay ganacsatada sidii ay door mug leh uga qaadan lahaayeen gurmadka abaaraha aafeyey dadkii iyo duunyadii ku dhaqnayd gobollada Puntland.
Ganacsatadii kasoo qayb gashay shirka ayaa Madaxweyne ku-xigeenka u sheegay inay samaysteen guddi isla markaana gudoomiye u doorteen sheekh Fu’aad Maxamuud Xaaji Nuur oo kamid ah ganacsatada iyo Culumaa’udiinka Puntland, guddigaas oo Akoonno ka furi doona bangiyada Dahabshiil, Amal iyo Salaam Bank, isla markaana ay u hawl-geli doonaan sida ugu dhaqsaha badan.
Dhanka kale kulan Garowe isugu yimaadeen qaar kamid guddiga abaaraha ee dhanka dowladda, waxay kaga hadleen taakulayntii ugu danbaysay ee ay sameeyeen isagoo tilmamay in dowladdu ku deeqday lacag dhan $156,000.
GAROWEONLINE
