Puntland oo mar kale ka digtay isticmaalka bacda
-
- Posted On 15-09-2014, 01:36PM
Isniin, Sept 15, 2014 (Garowe Online)- Mamulka magalada Garowe ayaa bilaabay olole ka dhan ah bacda oo horay Puntland go'aan lagu joojiyano usoo saartay.
Magalada Garowe oo ah xarunta Puntland ayaa maanta oo Isniin ah waxaa laga dareemayaa barnaamijkan bacda lagula dagaalamayo, sida uu Radio Garowe u sheegay Xoghayaha Dowladda Hoose Qaasim Maxamad Cabdi.
Qaasim ayaa tilmaamay inay muhiim tahay qaadashada go'aanka dowladda ee lagu joojiyay isticmaalka iyo ka ganacsiga bacda oo la aaminsan yahay inay saamayn xun ku yeelatay deegaanka iyo xoolaha. Waxuu intaas raaciyey in tallaabo sharciga waafaqsan laga qaadi doono cidii lagu arko iyadoo isticmaalaysa bacda.
''ciddii aanu ku helno iyagoo isticmaalaya bacda tallaabo sharciga waafaqsan ayaan ka qaadaynaa sida ganaaax, meheradda oo laga xiro, shatigoo laga qaado iyo xarig...hadda waxaan wadnaa olole bacda looga aruurinayo magalada Garowe waana sii wadaynaa'' Xoghayaha Dowladda Hoose ee Garoowe ayaa yiri.
Dowladdii hore ee Cabdiraxmaan Farole ayaa go'aan adag kasoo saartay isticmaalka iyo ka ganacsiga bacda balse go'aankaas ayaa noqday mid aan si toos ah u dhaqan galin.
Gollaha wasiradda Xukumadda Gaas ayaa dib usoo cusboonaysiiyay qaraarka looga hortagayo bacda, mana muuqato ilaa iyo hadda wixii ay dadku bacda bedelkeeda isticmaali lahaayeen.
GAROWE ONLINE
