Qarjab: " Puntland cid weerari mayso, waase is difaaceysaa "
-
- Posted On 09-12-2015, 01:47PM
December 9, 2015 (GO)- Dowladda Puntland ayaa markii ugu horreysey ka hadashay xiisad colaadeed oo maalmihii u dambeeyey laga soo sheegayey degmada Towfiiq ee gobolka Mudug, kadib markii mileeshiyo beeleed kasoo jeeda deegaanada Galmudug ay dhaq-dhaqaaqyo ciidan ka bilaabeen duleedka degmada Towfiiq.
Wasiirka Amniga Puntland, Cabdi Xirsi Qarjab ayaa sheegay in dowladdu ka warqabto dhaqdhaqaaqyada ciidan ee Galmudug ka waddo deegaano ku dhow degmada Towfiiq, isagoo wax laga xumaado ku tilmaamay in mar kale colaad gobolka dib looga huriyo.
"haddii xadka Puntland lasoo weeraro ama ciidamo lasoo dhoobo, dadka waxan ku wargelinaynaa inay is difaacaan gacamahana aysan laaban...anagu nabadda waa rabnaa laakiin nabaddu waa inay noqoto mid lagula rabo, hal dhinac nabaddu kama shaqeyn karto" ayuu yiri.
Dhanka kale, Guddoomiyaha Towfiiq, Maxamed Cabdulqaadir Axmed ayaa warbaahinta u xaqiijiyey dhaq dhaqaaqyada ciidan ee mileeshiyaadka Galmudug wadaan. Guddoomiyuhu wuxuu sidoo kale sheegay in ilaa iyo hadda aysan ogeyn sababta arrintan ka dameysa.
Wararka madaxa bannaan ee Garowe Online helayo ayaa tibaaxaya in xiisadani ka dhalatay dilkii ganacsade Daahir Gode-Gode oo December 4, 2015 lagu diley meel u dhow garoonka diyaaradaha ee Gaalkacayo. Mileeshiyaadka isku uruursanaya duleedka degmada Towfiiq waxay isku hayb yihiin ganacsade Gode Gode.
Puntland iyo Galmudug ayaa dhowaan heshiis kala saxiixday kadib dagaallo khasaare badan geystey oo labada dhinac ku dhex maray magaalada Galkacayo.
GAROWE ONLINE
