Ururrada naafada Puntland oo Garowe ku shiray
-
- Posted On 18-11-2014, 03:58PM
November 18, 2014 (GO)- Ururrada ku mideysan Dallada Naafada Puntland ayaa maanta magaalada Garoowe ku yeeshay kulan aqoon isweydaarsi ahaa oo laysaga xogwaraysaneyey siyaasadda naafada Puntland ee horay loo meel mariyey.
Kulanka waxaa ka soo qayb galay xubno ka socdey ururada naafada Puntland iyo mas'uuliyiin ka tirsan Hay'adda Handcap International.
Gudoomiyaha Naafada Puntland Cali Cabdi Aadan ayaa faahfaahin ka bixiyey ujeedada kulanka, isagoo sheegay inay tahay sidii wax laysaga weydiin lahaa waxa ka qabsoomay siyaasadda naafada.
Cali Cabdi ayaa dhanka kale ku booriyey ururrada ka qayb gelaya kulanka in arintan mudada halka maalin ah ee kulanku socdo ay si wanaagsan uga doodaan.
Madaxa Xafiiska Hay'adda Handicap ee Puntland Maxamed Faarax oo isna goobta ka hadlay ayaa sheegay in hay'adda Handicap u taagan tahay u qareemidda iyo weliba taageerista naafada meel kastoo ay joogaan.
Siyaasada Naafada Puntland oo dhawaan la meel mariyay waxaa fikirkeeda lahaa Xukuumadii hore ee Madaxwayne Cabdiraxmaan Faroole.
GAROWE ONLINE
