Wadada Suldaan Siciid Garowe oo la dhagax dhigay [Dhagayso]
-
- Posted On 29-10-2015, 01:11PM
28 Octobar, 2015(GO)-Waxaa maanta magalada Garowe la dhagax dhigay waddo laami la saarayo oo qayb ka ah mashruuca hormarinta degmooyinka Puntland ee JPLG.
Madaxweyne ku-xigeenka Puntland, wasiir ku-xigeenka wasaaradda arrimaha gudaha iyo maamulka degmada Garowe ayaa ka qayb galay dhagax dhigga wadada Suldaan Siciid ee magalada Garowe.
Gudoomiyaha degmada Garowe Xasan Maxamed Ciise "Goodir" ayaa sheegay in jidka dhererkiisu yahay 500 Mitir, waxaana ku baxaya kharash dhan 48,000 oo dollar.
Goodir ayaa tilmaamay in degmadu kaga qayb qaadatay lacag dhan 20,000 oo dollar, waxaana dhismaheedu qaadan doonaa labo bilood.
Madaxweyne ku-xigeenka Puntland Cabdixakiim Cabdullaahi Xaaji Cumar Camey, ayaa soo dhaweeyay hormarka ka socda magalada Garowe, waxuuna tilmaamay in degmadu ku jirto meelaha ugu bilicsan Somalia.
Dhinaca kale, maamulka degmada Garowe, ayaa shaaciyay inay wadaan bur-burinta dhismayaasha sharci darada ah ee laga dhisay waddooyinka magalada, waxayna shacabka ugu baaqeen inay banneeyaan goobaha sida sharci darada ah u xiran.
GAROWEONLINE
