Wafdi ka socda Midowga Yurub oo Galkacayo gaarey
-
- Posted On 01-12-2015, 07:24AM
December 1, 2015 (GO)- Wafi ka socda Midowga Yurub ayaa gaarey magaalada Gaalkacayo ee xarunta gobolka Mudug.
Wafdigan oo qayb ka noqon doona dadaallada nabadeynta ee maalmihii lasoo dhaafay socdey, waxaa hoggaaminaya Wakiilka Midowga Yurub ee Soomaaliya, Michele CervoneD'Urso.
Horay waxaa magaalada Gaalkacayo ugu sugnaa wufuud ka kala socda Dowladda Federaalka, Puntland, Galmudug, Jubaland iyo Koonfur Galbeed.
Waxaa sidoo kale 24tii saac ee u dambeeyey magaalada soo gaarayey wufuud tiro badan oo isugu jira madaxda dhaqanka iyo culimaa'uddiin.
Dhanka kale warar aan la xaqiijin ayaa sheegaya in uu magaalada Galkacayo kusoo wajahan yahay Ergeyga Qaramada Midoobey u Qaabilsan Soomaaliya, Nicholas Kay.
Kay oo isagu labo sano iyo bar xilkan soo hayey, qayb weynna ka qaatey Higsiga 2016 iyo hirgelinta nidaamka federaalka, wuxuu muddo-xileedkiisu ku egyahay dhammaadka bishan December.
GAROWE ONLINE
