Wasiir Dirir: Xubno katirsan Daacish ayaa isku dhiibay Ciidamada Puntland

GAROWE, Puntland - Wasiirka Warfaafinta Puntland, Maxamuud Caydiid Dirir, ayaa shaaca ka qaaday in dagaalyahano Ajaanib ah oo katirsan kooxda Daacish ay isku soo dhiibeen ciidamada, xilli howlgalo ballaaran uu ka socdo gobolka Bari.

Wasiirka ma uusan shaacin dalalka ay ka soo jeedaan, balse wuxuu xusay inay dowladda Puntland la kaashanayso hay'adaha caalamiga ah sida Hay'adda Socdaalka Adduunka (IOM) iyo Bisha Cas in dib loogu celiyo dalalkoodii ay ka yimaadeen.

Bishii la soo dhaafay, ugu yaraan 8 ka tirsan Daacish oo u kala dhashay dalalka Yemen, Tunisia, Tanzania, Algeria, iyo dalal kale ayaa lagu dilay weerar la fashiliyay oo lagu qaaday saldhig ciidan oo ku yaalla deegaanka Dharjaale ee gobolka Bari ee Puntland.

Daacish faraceeda Soomaaliya waxaa Puntland ku aas aasay hogaamiyihii hore ee Al-Shabaab Cabdulqaadir Muumin dabayaaqadii sanadkii 2015. Kooxdan ayaa kula tartanta Al-Shabaab maamulida gobolka iyo lacagaha ay ka qaataan ganacsiga Boosaaso.

Dhinaca kale, Wasiirka Warfaafinta Puntland ayaa meesha ka saaray wararka la isla dhexmarayo ee sheegaya in dagaalyahanadan Ajaanibka ah laga saarey Cafiskii Madaxweyne Siciid Cabdullaahi Deni u fiyay dagaalyahanada katiran Al-Shabaab iyo Daacish ee kasoo baxa kooxahan hadda ku socdo gulufka dagaal.

GAROWE ONLINE