Xildhibaan qiray sii deyntii sarkaal Al-shabab ka tirsan
-
- Posted On 16-12-2014, 01:42PM
December 16,2014 (GO)- Maalin kadib markii lasii daayey Cabdirasaaq Tahliil oo ah sarkaal ka tirsan Al-shabaab kaasoo sanad kahor ciidamada ammaanku qabteen ayaa waxaa arintaas qiray Xildhibaan Maxamuud Faarax Warsame oo ka tirsan Barlamanka Puntland.
Xildhibaanka oo isagu qayb ka ahaa xubnihii goob jooga ahaa goobtii ninkaas lagu wareejiyey ayaa waraysi gaar ah oo Radio Sahan uu siiyey ku faah faahiyey qaabkii lagu sii daayey.
Wuxuu sheegay in ujeedada koowaad ee Tahliil loo sii daayey ahayd sidii loo soo furan lahaa saddex nin oo kasoo jeeda Puntland, kuwaasoo ay afduubteen mileeshiyo ninkaas isku hayb yihiin.
Dowladii hore ee Madaxweyne Cabdiraxmaan Farole ayaa diidey sii daynta Cabdirisaaq Tahliil oo isagu ahaa madaxa saadka kooxda Al-shabab ee gobollada dhexe, maadaama tallaabadaasi horseedi doonto in maxaabiista Shabaabka ah madax furasho lagu sii daayo.
GAROWE ONLINE
