Qaramada Midoobay oo baaq u dirtey hogaamiyeyaasha Soomaaliya

Codsiga Swan ayaa ku soo beegmaya iyadoo ay jiraan xiisado siyaasadeed iyo dhaqdhaqaaqyo iska soo horjeeda.

MUQDISHO, Soomaaliya - Ku-simaha Ergeyga Gaarka ah ee Qaramada Midoobay u qaabilsan Soomaaliya, James Swan, ayaa ku nuux-nuux saday baahida loo qabo in madaxda Soomaalida ay u midoobaan wax ka qabashada caqabadaha qaranka, intii uu ku guda jiray booqashadiisa Garoowe Sabtidii.

Swan oo ay wehlinayaan saraakiil sare oo ka socda hay’adaha muhiimka ah ee Qaramada Midoobay ayaa la kulmay madaxweynaha Puntland Siciid Cabdullaahi Deni oo ay ka wada hadleen arrimaha mudnaanta u leh horumarinta, arrimaha amniga iyo doorashooyinka deegaanka ee soo socda.

Swan ayaa ku booriyay hoggaamiyeyaasha Muqdisho iyo Garoowe, oo ay weheliyaan madaxda kale ee dawladdaha xubnaha ka ah dawladda Faderaalka, in ay "ka gudbaan khilaaf kasta oo jira" oo ay iska kaashadaan xallinta caqabadaha dalka.

Waxa uu soo hadal qaaday horumarada la gaaray sanadihii ugu dambeeyay, waxa uuna carabka ku adkeeyay in ay muhiim tahay in la iska kaashado sidii shacabka Soomaaliyeed ay uga faa’ideysan lahaayeen.

Codsiga Swan ee midnimada madaxda Soomaalida ayaa ku soo beegmaya iyadoo ay jiraan xiisado siyaasadeed iyo dhaqdhaqaaqyada Puntland ee ku aaddan gooni-isu-taagga.

Bishii Maarso ee sanadkan aan ku jirno ee 2024, Puntland waxay kala noqotay aqoonsiga dowladda federaalka ah ee Soomaaliya ka dib markii wax laga beddelay dastuurka.

Iyadoo ay jiraan khilaafyo weli taagan, haddana dowladda Federaalka Soomaaliya waxay dib u bilowday mashaariicdii horumarineed ee Puntland bishii June 2024.

Madaxweyne Deni ayaa horay ugu baaqay deeqo caalami ah iyo taageero miisaaniyadeed oo toos ah, wuxuuna caddeeyay inay diyaar u yihiin wada hadal toos ah oo ay la yeeshaan dowladda Federaalka.

Si kastaba ha ahaatee, Puntland ayaa diiday warbixin federaal ah oo ku saabsan howlgallada ka dhanka ah Al-Shabaab bishii Maajo 2024, taasoo muujineysa in weli la isku mari la’yahay xeeladaha amniga. La dagaalanka Al-Shabaab iyo Daacish waxaa Soomaaliya si weyn uga taageera dowladda Mareykanka.

GAROWE ONLINE