Soomaaliya iyo Itoobiya oo soo dhaweeyay heshiis lagu saxiixay Muqdisho

MUQDISHO - Soomaaliya iyo Itoobiya ayaa soo dhaweysay heshiiskii ciidanka ee dhawaan dhex maray Ciidanka Xoogga Dalka Soomaaliyeed (SNA) iyo Ciidanka Qaranka ee Itoobiya (ENDF), kaasoo furey wada-shaqeyn cusub oo ku saleysan ixtiraam iskaashi iyo ilaalinta buuxda ee madax-bannaanida iyo xuduudaha labada dal.

General Odowaa Yusuf Rage ee SNA iyo Field Marshal Birhanu Jula ayaa kulmay dhowr maalmood ka hor inta uusan madaxweyne Xasan Sheekh Maxamuud martigelin Ra'iisul Wasaaraha Itoobiya Abiy Axmed ee Muqdisho, halkaasoo heshiiska ay ansixiyeen labada dhinac.

Warsaxaafadeed wadajir ah oo ay soo saareen labada waddan ka dib booqashada Abiy, ayaa lagu sheegay in heshiiska dhexmaray taliyayaasha uu yahay "tallaabo muhiim ah" oo lagu "xoojinayo wada-shaqeynta amniga" iyo kor u qaadista xasilloonida gobolka.

Labada hogaamiye ayaa qirey in booqashadan ay xoojinayso “dib u heshiisiinta xiriirka labada dhinac” kadib bilo badan oo wadahadallo ah. Waxaana ay adkeeyeen "xiriirka qoto dheer ee taariikhiga ah" iyo muhiimadda ay leedahay "dhisidda kalsoonida" iyada oo la adeegsanayo “wada-shaqeyn siyaasadeed, dhaqaale, iyo bulsho oo xooggan.”

Soomaaliya iyo Itoobiya ayaa dib u bilaabay xiriirkooda kadib sanadkii diplomasi oo xumaaday ka dib markii Itoobiya ay saxiixday heshiis la xiriira Somaliland, oo ah gobol ka go’ay Soomaaliya, kaasoo Itoobiya siinayay 20 kilomitir oo marin Badda Cas ah si loo helo aqoonsi caalami ah.

Soomaaliya ayaa si ka duwan uga falcelisay, iyadoo saxiixday heshiis militari oo la leh Masar, oo ah cadow dhaqameed Itoobiya, isla markaana ka mamnuucday in Ciidanka Qaranka ee Itoobiya ka qaybqaato Hawlgalka Midowga Afrika ee Taageerada iyo Xasilloonida Soomaaliya (AUSSOM).

Si kastaba, Soomaaliya iyo Itoobiya ayaa heshiis ka gaaray ka qaybgalka Ciidanka Qaranka ee Itoobiya ee hawlgalka AUSSOM, kaasoo bilowday bishii Janaayo. Labada dal ayaa sidoo kale heshiis la galay kooxo farsamo si loo helo habka ugu wanaagsan ee Itoobiya ay ku heli karto badda iyada oo aan la xadgudbin madax-bannaanida Soomaaliya.

Booqashadii Madaxweynaha Xasan Sheekh ee Itoobiya bishii Janaayo ayaa noqotay mid muhiim ah, iyadoo labada dhinac ay ku heshiiyeen “wakiilnimo buuxda oo diblomaasiyadeed” iyo wadashaqeyn dhaqaale iyo amni oo ballaaran. Turkey ayaa kaalin weyn ka ciyaartay geedi-socodka dhexdhexaadinta.

Ciidamada AUSSOM ee laga soo xulay Kenya, Itoobiya, Jabuuti, Masar, iyo Uganda waxay ka kooban yihiin 11,900 askari. Si kastaba, Burundigu wuxuu ku hanjabay inuu soo saaro ciidamadiisa ka dib markii uu ku guuldareystay in uu heshiis la gaaro Soomaaliya oo ku saabsan tirada saxda ah ee askarta, iyadoo Bujumbura ay dooneysay 1,000 oo askari oo dheeraad ah.

GAROWE ONLINE